Школьнікі з Беларусі заваявалі 4 медалі на Мендзялееўскай алімпіядзе па хіміі

Беларускія школьнікі паспяхова выступілі на 53-й міжнароднай Мендзялееўскай алімпіядзе па хіміі, якая прайшла ў канцы красавіка ў Санкт-Пецярбургу. Па яе выніках каманда заваявала залаты, сярэбраны і два бронзавыя медалі, паведамілі БЕЛТА ў прэс-цэнтры Міністэрства адукацыі.

У склад беларускай каманды ўвайшлі школьнікі з Мінска, Мазыра і Маладзечна. На алімпіядзе ім трэба было выканаць заданні трох тураў: першы і другі былі тэарэтычныя, трэці - эксперыментальны. "У першым туры ўдзельнікам прапанавалі восем абавязковых задач. У другім - заданні падзяляліся па тэмах, школьнікам трэба было выбраць па адной задачы з кожнай: неарганічная хімія, арганічная хімія, аналітычная хімія, фізічная хімія і навукі аб жывым. Эксперыментальны этап меў на ўвазе наяўнасць у школьнікаў навыкаў работы ў хімічнай лабараторыі: уменне выконваць хімічны аналіз рэчываў і праводзіць сінтэз па прапанаванай методыцы", - расказалі ў прэс-цэнтры.

Работы ацэньваў аргкамітэт і метадычная камісія алімпіяды, у склад якіх увайшлі прафесары і выкладчыкі вядучых ВНУ, а таксама настаўнікі хіміі агульнаадукацыйных школ краін-удзельніц.

Міжнародная Мендзялееўская алімпіяда школьнікаў па хіміі - пераемніца Усесаюзнай алімпіяды, якая штогод праводзілася ў СССР. Пасля распаду Савецкага Саюза традыцыю аднавілі ў 1997 годзе. З 2004 года акрамя краін СНД і Латвіі, Літвы, Эстоніі ў алімпіядзе сталі ўдзельнічаць Балгарыя, Македонія і Румынія, з 2012-га - Венгрыя, Турцыя і Саудаўская Аравія. У 2016 годзе на алімпіяду ўпершыню прыехалі школьнікі з Ізраіля, Манголіі і Нігерыі, а ў гэтым у спаборніцтве ўпершыню ўдзельнічалі Аўстрыя, Ірак, Іран, Кітай, Славакія, Сірыя і Чэхія.

Новости Беларуси (БЕЛТА)