У Беларусі далі старт дабрачыннай акцыі "Нашы дзеці"
У Беларусі стартавала рэспубліканская навагодняя дабрачынная
акцыя "Нашы дзеці". Галоўнай пляцоўкай старту стаў Гомельскі
палацава-паркавы ансамбль, перадае карэспандэнт БЕЛТА.
У горадзе над Сожам сабралася 350 хлопчыкаў і дзяўчынак з Гомельскай
вобласці. Дзеці з іншых абласцей Беларусі сталі сведкамі старту
дабрачыннага марафону дабра, цудаў і чараўніцтва, далучыўшыся да
навагодняга тэлемоста.
На старце навагодняга марафону расчыніла свае дзверы "Акадэмія добрых
спраў", дзе галоўны прафесар чараўніцтва - Дзед Мароз са Снягурачкай.
"Сёння мы пачынаем навагоднія ўрачыстасці і даём старт нашай
традыцыйнай дабрачыннай акцыі "Нашы дзеці". У хуткім часе да яе
далучыцца і другі дзяржаўны праект - "Ад усёй душы", які арыентаваны на
пажылых людзей. Гэта традыцыя. Калі ў супольнасці людзей ёсць традыцыі,
значыць, гэта супольнасць адбылася. А ў нашай краіне такіх традыцый
шмат", - падкрэсліла намеснік прэм'ер-міністра Беларусі Наталля
Пяткевіч.
Адным з першых рашэнняў Прэзідэнта, нагадала яна, было правядзенне
менавіта акцыі "Нашы дзеці" ў рамках дзяржаўнай праграмы па падтрымцы і
абароне дзяцей. "І сёння 31-ы раз мы праводзім гэту акцыю. Калі ў
пачатку гэта было свята для дзяцей, якія асабліва маюць патрэбу ў
абароне, пазбаўлены сямейнай утульнасці, засталіся без бацькоў, то сёння
гэта акцыя (аб'ядноўвае ўсіх. - Заўвага БЕЛТА) дзяцей і дарослых", -
адзначыла намеснік прэм'ер-міністра.
Віцэ-прэм'ер звярнула ўвагу: да марафону дабра актыўна далучаюцца
дзяржаўныя органы, іншыя арганізацыі. "Калі пачыналі з дзясятка
(арганізацый. - Заўвага БЕЛТА), то ў гэтым годзе 160 арганізацый будуць
удзельнічаць у акцыі. Будзе наведана каля 150 розных устаноў, дзе
запланаваны спектаклі, святы, карнавалы і іншыя мерапрыемствы, дзе
дзецям уручаць падарункі. Больш за мільён дзяцей будзе ахоплена гэтай
акцыяй", - расказала Наталля Пяткевіч.
Яна зрабіла акцэнт на тым, што навагоднія святы - гэта заўсёды час
падарункаў. "Сёння сталіцай "Акадэміі добрых спраў" усёй рэспублікі стаў
цудоўны горад (над Сожам. - Заўвага БЕЛТА). І калі вы, дзеці і
дарослыя, будзеце загадваць жаданне для сябе, папрасіце абавязкова
што-небудзь яшчэ для кагосьці: для сябра, для бацькоў, для бабуль,
дзядуль, для дзяцей або дарослых, якіх вы нават не ведаеце. І тады ўся
наша краіна на гэты месяц ператворыцца ў вялікую "Акадэмію добрых
спраў", - упэўнена Наталля Пяткевіч.
Добрай традыцыяй, сімвалам клопату, увагі і шчырай любові да дзяцей
назваў акцыю "Нашы дзеці" старшыня Гомельскага аблвыканкама Іван Крупко.
"Нам вельмі прыемна, што ў гэтым годзе акцыя пачынаецца менавіта ў
Гомелі, таму што гомельская зямля багата на цуды. Яны ўсюды. Напрыклад, у
гэтым парку больш за 60 ручных вавёрак, на галоўнай плошчы - цуда-ёлка і
рэзідэнцыя Дзеда Мароза. А ўсяго іх у вобласці 19. У тым ліку ў
Нацыянальным парку "Прыпяцкі" - вялікі маёнтак Палескага Зюзі з ляснымі і
казачнымі жыхарамі", - расказаў кіраўнік рэгіёна.
"Мы імкнёмся, каб увага, усмешкі і навагодняе чараўніцтва былі ў
кожнага дзіцяці. Дзякуючы клопату нашага Прэзідэнта і кожнага дарослага
беларуса, хто ўключаецца ў дабрачынны марафон, акцыя "Нашы дзеці" будзе
жыць і аб'ядноўваць усю краіну", - упэўнены старшыня аблвыканкама.
Націснуўшы чароўную кнопку, ганровыя госці далі старт акцыі, якая
палюбілася ўсім. Праз навагодні тэлемост усе вобласці і сталіца перадалі
цёплыя прывітанні і душэўныя пажаданні. Акрамя таго, кожны рэгіён
прапанаваў сваю чароўную кнігу добрых спраў: Гомель - "Кнігу шчодрасці",
Мінск - "Кнігу сталічных цудаў", Брэст - "Энцыклапедыю сардэчнага
цяпла", Віцебск, Гродна, Магілёў - "Бібліятэкі дабрыні".
У чаканні цудаў ад акцыі - юная веткаўчанка Ксюша Гарбачова.
Дзяўчынка падзялілася, што адыходзячы год запомніцца ёй выступленнямі на
вакальных конкурсах і заваяванымі ўзнагародамі. "Шчаслівая быць на
адкрыцці акцыі. Вельмі здзівіў сёння гомельскі парк. Тут шмат розных
упрыгажэнняў, фотазон. Такая атмасфера чараўніцтва", - прызналася
школьніца.
"Наогул Новы год для мяне - гэта снег, падарункі, ёлка ўпрыгожаная,
Дзед Мароз. І хочацца, каб святы, акцыя "Нашы дзеці" падарылі ўсім нам
шмат цудаў", - дадала Ксюша.
"А я запомню адыходзячы год хвілінамі, праведзенымі з лепшымі
сябрамі, заняткамі спортам. Мне гэта падабаецца", - уключыўся ў размову
гамяльчанін Глеб Прыступа.
"Наша сярэдняя школа нумар 75 кожны год прымае ўдзел у акцыі "Нашы
дзеці". Мы віншуем дзяцей з дзіцячага дома, класамі збіраем падарункі,
перадаём сімвал года. Гэты год не выключэнне - абавязкова павіншуем
хлопчыкаў і дзяўчынак. Таксама мы віншуем ветэранаў", - расказаў юнак.
"Новы год - свята, якое аб'ядноўвае ўсіх, свята, у якое здараюцца
нейкія цуды і хочацца верыць у чараўніцтва", - сказаў на заканчэнне
Глеб.
Навагодняя дабрачынная акцыя "Нашы дзеці" штогод праходзіць у
Беларусі з 1995 года. Мэта акцыі - аказаць дапамогу і падтрымку дзецям,
якія асабліва маюць у іх патрэбу. У гэтым годзе дабрачынны марафон
праходзіць з 15 снежня, прадоўжыцца ён па 14 студзеня 2026 года.
