Нацыянальны цэнтр маркетынгу стварыў пералік імпартазамяшчальнай прадукцыі для прадпрыемстваў РФ

26 красавіка, Мінск /Кар. БЕЛТА/. Нацыянальны цэнтр маркетынгу Беларусі стварыў зводны рэестр наменклатуры імпартазамяшчальнай прадукцыі, у якой маюць патрэбу расійскія кампаніі. Аб гэтым карэспандэнту БЕЛТА паведамілі ў цэнтры.

Вядзенне рэестра дасць магчымасць аперыраваць актуальнымі звесткамі аб патрэбах расійскіх кампаній у аналогах імпартных камплектуючых і абсталявання, сыравіны і матэрыялаў, якія выпускаюцца беларускай прамысловасцю.

Для аблягчэння пошуку партнёраў у Беларусі Нацыянальным цэнтрам маркетынгу распрацавана новая паслуга - па запатрабаванні расійскіх кампаній упраўленне маркетынгавай інфармацыі будзе прадастаўляць звесткі аб беларускіх вытворцах асобных відаў прадукцыі, якая патэнцыяльна можа быць выкарыстана ў якасці імпартазамяшчальнай, з пазначэннем кантактных даных і адказных асоб беларускіх прадпрыемстваў.-0-